गछिया / मोरङको सुन्दरहरैँचा नगरपालिका वडा नम्बर ६ मा कँडेल बन्धुहरूले आफ्नो कुल देवता स्थापना गरेका छन्। भरत कँडेलको घरमा शनिबार भारद्वाज गोत्रका कँडेल बन्धुहरूले कुलको मन्दिर स्थापना गरेका हुन्।
बेलबारी नगरपालिका ११ लक्ष्मी मार्गस्थित कँडेल बन्धु प्रतिष्ठान शाखाका अध्यक्ष बालकृष्ण कँडेलले भने, “हाम्रो प्रतिष्ठान बेलबारी ११ मा भए पनि कुलको मन्दिर र देवता कँडेल बन्धु समाजको मूल घरमा राख्ने चलन छ। त्यसैले भरत कँडेलको घर मूल घर भएकाले त्यहीँ स्थापना गरिएको हो। तर कँडेलहरूको देवाली गर्दा भने बेलबारी ११ को प्रतिष्ठानमा भेला भएर गरिनेछ।”
कार्यक्रममा बेलबारी शाखाका कोषाध्यक्षले सङ्खुवासभा चैनपुरमा पूर्वाञ्चलका कँडेल बन्धुहरू भेला भएर देवाली गर्ने प्रतिष्ठान रहेको बताए। तर पछिल्लो समय तराईमा कँडेल बन्धुहरूको जनघनत्व बढेकाले बेलबारी ११ मा शाखा प्रतिष्ठान स्थापना गरिएको उनले जानकारी दिए।
कँडेलहरूको मन्दिर मूल घरमा राखिने चलनअनुसार सुन्दरहरैँचा ६ शिवालय टोलस्थित भरत कँडेलको घरमा स्थापना गरिएको हो। पहाडमा रहेका कँडेल बन्धुहरूले चैनपुरको प्रतिष्ठानमा र तराईतिरकाले बेलबारी ११ को शाखा प्रतिष्ठानमा देवाली गर्ने सहमति भएको छ।
सुन्दरहरैँचा नगरपालिका वडा नम्बर ६ मा महेन्द्र राजमार्गबाट उत्तरतर्फ मैशोर मार्ग हुँदै कँडेल बन्धु बान्धव, कुल, कुटुम्ब, चेलीबेटी, भान्जाभान्जी र प्रतिष्ठित व्यक्तिहरूको उपस्थितिमा कार्यक्रम सम्पन्न भएको थियो। कार्यक्रममा पञ्चेबाजाको साथमा कँडेल बन्धु समाजले मन्दिरलाई डोली बनाएर नाच्दै गाउँदै तीन जना धामीको साथमा धार्मिक विधि विधान अनुसार ३ बजे मन्दिर स्थापना गरिएको थियो।