गछिया / मोरङको सुन्दरहरैचा – ३, आइतबारेमा वरपिपलको विवाह भव्य रूपमा मङ्गलबार गरिएको छ। कार्यक्रम आफ्ना स्वर्गीय बुबा जेष्ठराम राई, आमा मनमाया राई र आमा नौमती राई साथै भाइ सन्तबहादुर राईको सम्झनामा पार्टी चौतारा बनाई बर पिपल रोपिएको हुँदा बरलाई बेहुला र पिपललाई बेहुली बनाई विवाह गरिदिएको हो।
बर र पिपलको विवाह चलनचल्ती अनुसार विवाह पद्धति अनुसार नै जग्गे खडा गरी पण्डितद्वारा पाठपुण्य गरी बरपिपलको विवाह गरिएको थियो। बरको बोटबाट जन्ती गएर पिपललाई बेहुला पक्षले सिन्दुर टिका र फुलमाला लगाई अन्म्याउने काम गरी जन्ती फर्केका थिए।
कार्यक्रममा बर र पिपलको विवाहमा पन्चेबाजा समेत बजाइएको थियो पन्चेबाजाको धुन र गीतमा नृत्य गरेर कार्यक्रमलाई भव्य रमाइलो गरिएको थियो।
कार्यक्रममा उपस्थित महानुभावहरूलाई रोटीपुरीका साथमा खानपिनको समेत व्यवस्था थियो।
कार्यक्रम भोजपुर दोभाने गाउँ विकास समितिबाट सुन्दरहरैचा – ३, आइतबारेमा बसाइसरी आई पार्टी चौतारा बनाई बरपिपल रोपी आज हामी परिवार छोरा बुहारीहरू अर्जुनकुमार राई र श्रीमती कुमारी राई र बुद्ध राई छोरा सहदेव राई श्रीमती कमलादेवी राई छोरी लक्ष्मी राई कमला राई र खड्ग बहादुर राई प्रेमबहादुर राई लगायत सपरिवारको आयोजनामा लाखबत्तीबाली स्वर्गीय बुवाआमा र भाइको नाममा रोपिएको वरपिपललाई पूजा विधिद्वारा विवाह गरिदिएको र यसबाट पछाडिका भावी सन्ततिले पनि यो संस्कारलाई गरिरहनु र उनीहरूको राम्रो होस् भन्ने मनसायका साथ यो कार्यक्रम गरिएको छोरा अर्जुन कुमार राईले कार्यक्रममा बताए।