ह्वात्तै घट्यो डलरको विनिमय दर, अरु देशको कति पुग्यो हेर्नुहोस् !

जागृति खबर संवाददाता

८ माघ, काठमाडौं ।

नेपाल राष्ट्र बैंकले आईतबारको लागि विनिमय दर सार्वजनिक गरेको छ । आइतबार अमेरिकी डलरसँगै सबै विदेशी मुद्राहरुको मूल्य स्थिर छ ।

आज अमेरिकी डलर एकको खरिददर १२९ रुपैयाँ ५० पैसा र बिक्रीदर १३० रुपैयाँ १० पैसा कायम गरिएको छ । यसअघि शनिबार पनि अमेरिकी डलर १२९ रुपैयाँ ५० पैसा र बिक्रीदर १३० रुपैयाँ १० पैसामा कारोबार भएको थियो ।

युरोपियन युरो एकको खरिदमा १४० रुपैयाँ २६ पैसा र बिक्रीमा १४० रुपैयाँ ९१ पैसा पाइन्छ। त्यस्तै, बेलायती पाउण्ड स्टर्लिङ एकको खरिददर आज १५९ रुपैयाँ ८२ पैसा र बिक्रीदर १६० रुपैयाँ ५६ पैसा तोकिएको छ।

त्यसैगरी, अष्ट्रेलियन डलर एकको खरिदमा आज ८९ रुपैयाँ ७६ पैसा र बिक्रीमा ९० रुपैयाँ १८ पैसा तोकिएको छ। क्यानेडियन डलर एकको खरिदमा भने ९६ रुपैयाँ १३ पैसा र बिक्रीमा ९६ रुपैयाँ ५७ पैसा तोकिएको छ

यस्तै, कतारी रियाल एकको खरिदमा ३५ रुपैयाँ ५२ पैसा र बिक्रीमा ३५ रुपैयाँ ६८ पैसा पाइन्छ। राष्ट्र बैंकले साउदी अरेबियन रियाल एकको खरिददर ३४ रुपैयाँ ४७ पैसा र बिक्रीदर ३४ रुपैयाँ ६३ पैसा तोकेको छ।

युएई दिराम एकको खरिदमा ३५ रुपैयाँ २६ पैसा र बिक्रीमा ३५ रुपैयाँ ४२ पैसा छ। कुवेती दिनार एकको खरिदमा ४२३ रुपैयाँ ७१ पैसा र बिक्रीमा ४२५ रुपैयाँ ६८ पैसा तोकिएको छ । त्यसैगरी, बहराइन दिनार एकको खरिददर ३४३ रुपैयाँ ५२ पैसा र बिक्रीदर ३४५ रुपैयाँ १२ पैसा तोकिएको छ।

जसले गरे एक सय पटक रक्तदान
‘रक्तदान जीवन दान’ भन्ने गरिन्छ । यसै भनाइलाई आत्मसाथ गर्दै नवलपरासी (बर्दघाट सुस्तापूर्व) नवलपुरको कावासोती नगरपालिका–१६, डण्डा निवासी शिव गिरीले एक सय पटक रक्तदान गर्नुभएको छ ।

एक सय औँ पटकको रक्तदानपछि रक्तदाता गिरीले भन्नुभयो, “रगत दिन आफू पनि स्वस्थ हुनुपर्छ, म एक सय पटक रक्तदान गर्न पाउछु कि पाउदिन भन्ने लागेको थियो, पाँए, खुसी लागेको छ ।”

कावासोतीमा आफैँ अध्यक्षसमेत रहेको संस्था सहयोगी मनले शनिबार आयोजनामा गरेको रक्तदान कार्यक्रममा रक्तदान गरेपछि उहाँले एक सय पटक रक्तदान गरेको रेकर्ड कायम गर्नुभएको हो । उहाँले ३० वर्षअघि पहिलो पटक रक्तदान गर्नुभएको थियो ।

आफ्नै आमा बिरामी भएर अस्पतालमा उपचार गर्दा रगतको आवश्यकता प¥यो । आमाका लागि दुई पिन्ट रगतको आवश्यकता थियो । रगतका लागि विभिन्न संस्थासँग सहयोग माग्दा सहयोग नपाएपछि उहाँले आफैँले एक पिन्ट रगत दिनुभयो र एक पिन्ट अरुबाट लिनुभयो । सोही घटनापछि ‘रक्तदान जीवनदान’ भन्ने बुझेर उहाँले नियमित रक्तदान गर्दै आउनुभएको छ ।

“जिल्लामा हुने आधिकांश रक्तदानका कार्यक्रम मबाट नै सुरुआत हुने गरेको छ,” उहाँले भन्नुभयो । धेरै पटक रक्तदान गरेका कारण सम्मानस्वरुप यहाँ हुने रक्तदानका कार्यक्रममा उहाँले नै रक्तदान गरेपछि कार्यक्रम उद्घाटन हुन्छन् । गिरी भन्नुहुन्छ, “समाजका लागि अरु केही गर्न नसकेपनि रक्तदान गरेर धेरैको जीवन बचाएको छु, यसले मलाई आनन्द र खुसी दिन्छ ।”

नवलपुर अत्यधिक दुर्घटना हुने जिल्लामा पर्दछ भने छिमेकी जिल्ला चितवन अस्पतालै अस्पतालको जिल्लाका रुपमा प्रख्यात छ । चितवनमा क्यान्सर अस्पतालसमेत भएकाले पनि रगतको आवश्यकता धेरै पर्दछ । अस्पताल नजिक भएकाले पनि जिल्लाका धेरै मानिसलाई रगत दिने गरेको उहाँ बताउनुहुन्छ । उहाँले आवश्यकता पर्दा सुत्केरी तथा क्यान्सरका बिरामीलाई अस्पतल नै पुगेर रगत दिनुभएको छ । अहिले मध्यविन्दु जिल्ला अस्पतालमा शल्यक्रिया हुन थालेपछि रक्तदान गर्न नजिको अस्पताल पुग्ने गरेको गिरीको भनाइ छ । “रगत न त फ्याक्ट्रीमा बनाउन मिल्छ, न कतैबाट आयात हुन्छ, न त किन्न नै सकिन्छ, त्यसैले हामी स्वस्थ र दिन मिल्ने व्यक्तिले रक्तदान गर्नुपर्छ,” भन्नुहुँदै उहाँले सबैलाई रक्तदान गर्न आग्रह समेत गर्नुभयो ।

उहाँले समुदायमा नै नियमित रक्तदान गर्ने कार्यक्रमहरु हुन सकेको खण्डमा सबैलाई सहज हुने बताउनुभयो । “हामीले सामाजिक काम गर्ने उद्देश्यले सहयोगी मन नामक संस्था दर्ता गरेर विपद्मा परेकालाई सहयोग गर्ने, रक्तदान गर्ने कार्यक्रम गर्दै आएका छौँ । रक्तदानलाई प्रोत्साहन गर्न र अभियानकै रुपमा अगाडि बढाउन यस संस्थाले काम गर्छ,” उहाँले भन्नुभयो ।

रगत निकालिसकेपछि परीक्षण गरेर मात्रै प्रयोग हुने भएकाले रक्तदान गर्नु भनेको रगत परीक्षणको अवसर लिनु पनि भएको गिरीले बताउनुभयो । प्रत्येक तीन–तीन महिनामा रक्तदान गर्दा पुरानो रगत जाने र नयाँ रगत उत्पादन हुनेहुँदा मानिसको स्वास्थ्यलाई थप फाइदा पुग्ने उहाँ बताउनुहुन्छ ।

रक्तदान गर्दा कमजोर भइन्छ भन्ने जनमानसमा धारणा पाइन्छ तर त्यो गलत हो, रक्तदान गर्दा कमजोर हुने भए मैले आज सयौँ पटक रक्तदान गर्न कसरी सक्थे?, स्वस्थ मानिसले रक्तदान गर्नबाट डराउन हुन्न,” गिरीले भन्नुभयो ।