दिल्लीमा साताको दुई दिन कर्फ्यु घोषणा, मुम्बइमा पूर्ण लकडाउन हुँदै !

जागृति खबर संवाददाता

२० पुस, नयाँ दिल्ली ।

कोरोनाभाइरसको नयाँ भेरिएन्ट ओमिक्रोन संक्रमण अत्यधिक हुन थालेपछि भारतमा उच्च सतर्कता अपौना थालिएको छ । संक्रमण व्यापक वृद्धि भएपछि भारतको राजधानी नयाँ दिल्लीमा सप्ताहन्तमा कर्फ्यु लागू हुने भएको छ ।

नयाँ दिल्लीका मुख्यमन्त्री अरविन्द केजरीवाललाई समेत संक्रमण भएपछि आज बसेको दिल्ली विपत संकट व्यवस्थापन केन्द्रको बैठकले शनिबार र आइतबार कर्र्फ्यू लागू गर्ने निर्णय गरेको संचारमाध्यमले जनाएका छन् ।

दिल्ली विपत संकट व्यवस्थापन केन्द्रले कोरोनालाई लिएर नयाँ मापदण्ड पनि जारी गरेको छ । यसरी पनि संक्रमण नियन्त्रणमा नआए पूर्णरूपमा कर्फ्यु लगाउने तयारी गरिएको छ ।

मुम्बइमा भने दैनिक २० हजारभन्दा बढी संक्रमण भएको खण्डमा लकडाउन घोषणा गरिने मुम्बइकी मेयर किशोरी पेड्नेकरले बताएकी छिन् । उनले लकडाउनसहितका नयाँ गाइडलाइनको तयारी भैरहकेो जनाएकी छिन् ।

पछिल्लो २४ घण्टामा भारतभर ३७ हजार ३७९ संक्रमित थपिएका छन् । थप १२४ जनाको मृत्यु भएको छ ।

ऊर्जामन्त्री भुसालसँग बिमस्टेकका महासचिवको शिष्टाचार भेट

ऊर्जा, जलस्रोत तथा सिँचाइमन्त्री पम्फा भुसालसँग बहुपक्षीय प्राविधिक तथा आर्थिक सहकार्यका लागि बङ्गालको खाडीको प्रयास (बिमस्टेक) का महासचिव तेन्जिन लेक्फेलले शिष्टाचार भेट गर्नुभएको छ ।

मन्त्रालयमा आज भएको भेटमा उहाँहरूबीच बिमस्टेकको विविध विषयमा छलफल भएको छ ।

सो अवसरमा महासचिव लेक्फेलले बिमस्टेकका सम्मेलनले पारित गरेका ऊर्जा क्षेत्रका मुद्दालाई अगाडि बढाउने विषयमा सबै सदस्य राष्ट्रहरू सक्रिय भएर लाग्नुपर्नेमा जोड दिनुभयो । उहाँले सन् २०१८ मा सम्झौता भएको ऊर्जासम्बन्धी गुरु योजनाका विषयलाई प्राथमिकताका साथ अगाडि बढाउँदा सदस्य राष्ट्रलाई फाइदा हुने भएकाले त्यसतर्फ नेपाल सरकारको ध्यान जानुपर्ने बताउनुभयो ।

महासचिव लेक्फेलले भारतको ब्याङ्लोरमा स्थापना गर्ने भनिएको ‘इनर्जी सेन्टर’ स्थापना गरेर बिमस्टेककै ऊर्जासम्बन्धी माथिल्लो निकाय स्थापना गर्ने विषयलाई प्राथमिकतामा राख्नुपर्ने बताउनुभयो ।

जवाफमा मन्त्री भुसालले बिमस्टेकस्तरीय जलविद्युत् प्रयोग र प्रवद्र्धनका विषय अन्तरसम्बन्धित रहेको बताउँदै त्यसका लागि नेपालका तर्फबाट खेल्नुपर्ने भूमिका निर्वाह गर्न आफू तयार रहेको स्पष्ट पार्नुभयो ।

जलविद्युत् क्षेत्र नेपालका लागि महत्वपूर्ण भएको बताउँदै उहाँले ऊर्जामन्त्रीस्तरीय बैठक उपयुक्त समयमा तोक्ने विश्वास दिलाउनुभयो । उहाँले भन्नुभयो, “सबै सदस्य मुलुकका लागि उपयुक्त हुने गरी नेपालले मिति तोक्छ, त्यसका लागि हामी फोकल पर्सन तोकेर काम अगाडि बढाउँछौँ ।” सन् २०१० मा भएको मन्त्रीस्तरीय बैठकले नेपालले ऊर्जामन्त्रीस्तरीय बैठकको आयोजना गर्ने जिम्मेवारी पाएको थियो ।

बिमस्टेकको पाँचाँै शिखर सम्मेलन आगामी ३० मार्च २०२२ मा श्रीलङ्कामा आयोजना गर्ने प्रस्ताव भएको सन्दर्भमा बिमस्टेकका महासचिव लेक्फेल नेपाल भ्रमणमा आउनुभएको हो ।