मन्त्रीको पहलमा सुरु भयो यस्तो काम, विदेश जानेलाइ झनैै सजिलो

जागृति खबर संवाददाता

१ मंसिर, काठमाडौं ।

संस्कृति, पर्यटन तथा नागरिक उड्डयन मन्त्री प्रेमबहादुर आलेले त्रिभुवन विमानस्थलमा आन्तरिक र बाह्य हवाई यात्रा गर्ने यात्रुहरूको सहजताका लागि सटल बस सेवा सञ्चालन गर्ने बताउनुभएको छ ।

आज आइतबार नेपाल प्रज्ञा प्रतिष्ठान प्राज्ञ सभाको ३६ औँ बैठकको समुद्घाटन समारोहमा मन्त्री आलेले आन्तरिक र बाह्य विमानस्थलमा सटल बस सेवा सञ्चालन गर्ने जानकारी दिनु भएको हो ।

विमानस्थलमा रहेका ट्याक्सीहरुले चर्को भाडा लिँदै आएको गुनासो मन्त्री आलेलाई गरेपछि मन्त्री आलेले विमानस्थलमा चार वटा सटल बस निःशुल्क सञ्चालन गरिने बताउनु भएको हो ।

सोही क्रममा मन्त्री आलेले मजदुरहरूका लागि विमानस्थलमा विश्राम घरको निर्माण गर्न निर्देशन दिएको पनि नानकारी गराउनुभयो ।

उहाँले भारतीय समकक्षीसँगको भेटमा नेपाललाई भारतलगायत मध्यपूर्व र पश्चिमी देशहरूसँग जोड्ने पश्चिमतर्फको हवाई रुट लिमा–६२६ लाई दुईतर्फी बनाउन पनि आग्रह गरेको बताउनुभयो । “मन्त्रालयले विगतमा भन्दा अहिले धेरै तीव्रताका साथ काम गरेका छ,” मन्त्री आलेले भन्नुभयो, “म आइसकेपछि तीव्रताका साथ काम गरेको छु ।

एक सय चार दिनदेखि नेपाल एयरलाइन्सको अफिसमा भएको तालाबन्दी खुलाउने काम गरेँ । पीसीआर परीक्षणमा व्यापक अनियमितता भएको कुरा थियो, त्यसलाई मैले नियन्त्रण गरेँ, त्यसपछि जति पनि विदेश जाने हाम्रा श्रमजीवी मजदुरहरूको निमित्त एउटा छुट्टै विश्राम घरको निर्माण गर्ने भनेर मैले निर्देशन दिइसकेको छु । त्यो काम पनि चाडै हुन्छ ।”

मन्त्री आलेले भारतीय सिभिल एभिएशन मन्त्री ज्योतिरादित्य एम सिन्धियासँग भारतमा नेपाल एयरलाइन्सको दुई वटा विमान उडान भर्ने व्यवस्था मिलाउन पनि आग्रह गरिएको बताउनुभयो ।