मलेसियामा आवागमन नियन्त्रण आदेश लम्बियो

जागृति खबर संवाददाता

काठमाडौं :

मलेसियाले कोरोना भाइरस (कोभिड–१९) को माहामारी नियन्त्रण गर्न जारी गरेको आवागमन नियन्त्रण आदेश (एमसीओ) आगामी मार्चसम्म विस्तार गरेको छ । गत जनवरी १३ तारिखदेखी फेब्रअरी १८ तारिख बुधबारसम्मका लागि जारी गरेको आवागमन नियन्त्रण आदेशका बीचमा महामारी अपेक्षित निण्न्त्रणमा नआएपछि मलेसियाले आवागमन नियन्त्रण ओदश (एमसीओ) मार्च ४ तारिखसम्म लम्ब्याएको हो ।

मंगलबारमात्रै करिब ३ हजार नयाँ संक्रमित फेला परेको मलेसियामा हालसम्म २ लाख ७२ हजारभन्दा बढी संक्रमित रहेको स्थानीय सञ्चारमाध्यमहरुले बताएका छन् । मंगलबार त्यहाँ कोरोना संक्रमणबाट २२ जनाको मृत्यु भएको छ ।

मलेसियामा सबैभन्दा बढी राजधानी क्वालालम्पुरसँग जोडिएको राज्य सेलोङ्गार त्यसपछि क्रमशः जोहरवारु, सारावाक र राजधानी क्वालालम्पुरमा संक्रमति फेला परेका छन् । मलेसियामा विभिन्न १५ देशका १७ लाख बढी विदेशी कामदार रहेका छन् । त्यसमा नेपाली कामदारको संख्या तीन लाख पचास हजारभन्दा केही बढी रहेको छ ।

मलेसिया सरकारले मंगलबारसम्म ७ हजार विदेशी कामदार संक्रमित भएको जानकारी सार्वजनिक गरेको छ । मलेसियाले गत फेब्रुअरी पहिलो तारिखदेखि विदेशी कामदारको अनिवार्यरुपमा कोभिड जाँच गर्नुपर्ने नियम लगाएको छ । नेपालमा दर्ता रहेकामध्ये आधाभन्दा बढी म्यानपावर कम्पनीले मलेसियामा कामदार पठाउने गरेका छन् ।

मलेसियामा कोभिडको बढ्दो संक्रमणले नेपाली व्यवसायीहरुलाई समेत चिन्तित बनाएको छ । सरकारले वार्षिक एक सय जना कामदार नपठाएर ईजाजतपत्र रद्ध गर्ने नियम कार्यान्वयनमा ल्याइरहेको बेला कामदार जाने मुख्य गन्तव्य मुलुक महामारीको चपेटामा पर्दा व्यवसायीहरु चिन्तित बनेका हुन् ।