नेपालमा भयावह बन्दै कोरोना महामारी, २४ घण्टामा २२५ जनाको मृत्यु

जागृति खबर संवाददाता

काठमाडौं, २८ बैशाख ।

नेपालमा गत २४ घण्टामा २२५ जना कोरोना संक्रमितको मृत्यु भएको छ । यो सँगै कुल मृतकहरुको संख्या ४ हजार ८४ पुग्यो । स्वास्थ्य तथा जनसंख्या मन्त्रालयका अनुसार आज मात्रै ९ हजार ३१७ नयाँ संक्रमित थपिएका छन् । यो सँगै कुल संक्रमितहरुको संख्या ४ लाख १३ हजार १११ पुगेको छ ।

मन्त्रालयका अनुसार २४ घण्टामा ५ हजार २२५ जना निको भएका छन् । यो सँगै कुल निको हुनेहरुको संख्या ३ लाख १२ हजार १९ पुगेको छ । नेपालमा अहिले ९७ हजार ८ सक्रिय कोरोना संक्रमित रहेका छन् ।

कोरोनाबाट थप १३९ को मृत्यु,स्वास्थ्य संकटकाल घोषणाको तयारी

कोरोना संक्रमण उच्च बढेपछि सरकारले स्वास्थ्य संकटकाल घोषणा गर्ने तयारी गरेको छ। सोमबार स्वास्थ्य संकटकाल घोषणा गर्ने र अन्य विषयमा निर्णय गर्ने भनी कोभिड १९ संकट व्यवस्थापन केन्द्र (सिसिएमसी) को बैठक बसे पनि सबै सदस्य उपस्थित हुन नसकेपछि निर्णय हुन नसकेको सिसिएमसीका संयोजक उपप्रधानमन्त्री ईश्वर पोखरेलका पे्रस सल्लाहाकार गणेश पाण्डेले जानकारी दिए।

कोरोना महामारी नियन्त्रणका लागि स्वास्थ्य संकटकाल घोषणा तथा अन्य कदम चाल्न विज्ञको सुझाव आएपछि सिसिएमसीमार्फत मन्त्रिपरिषद्मा प्रस्ताव लैजाने तयारी भएको स्वास्थ्य तथा जनसंख्या मन्त्री हृदयेश त्रिपाठीले बताए। उनका अनुसार प्रस्तावमा स्वास्थ्य संटकाल घोषणा गरी केही समयका लागि देशैभरि लडकाउन गर्ने उल्लेख छ। ‘अहिलेको स्थितिले केही कठोर निर्णय गर्नुपर्ने भएको छ, अन्यथा नसकिने भनेर विज्ञहरूले सुझाव दिएका छन्’, मन्त्री त्रिपाठीले भने। प्रस्ताव सोमबार साँझसम्म मन्त्रिपरिषद्मा गइनसकेको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले बताए।